احتجاج میں شرکت پر اداکار عمران خان کو بھارت چھوڑنے کا حکم

بھارتی حکام نے بالی وڈ اداکار عامر خان کے بھانجے عمران خان کو انتخابی اصلاحات کے مطالبے کے لیے احتجاج میں شرکت کرنے پر 28 اکتوبر تک ملک چھوڑنے کا حکم دے دیا ہے۔ امریکی شہری عمران خان کے پاس اوورسیز سٹیزن آف انڈیا (OCI) کارڈ ہے، جو بھارتی نژاد افراد کو بھارت آنے اور وہاں قیام کی اجازت دیتا ہے۔ تاہم، اس کارڈ کے حامل افراد کو ووٹ ڈالنے یا انتخابات میں حصہ لینے کا حق حاصل نہیں ہوتا۔

ممبئی پولیس نے جمعرات کو اپنے بیان میں کہا کہ عمران خان نے ممبئی کے اگست کرانتی میدان میں ہونے والے احتجاج میں شرکت کی تھی، جہاں چیف الیکشن کمشنر گیانیش کمار سے استعفے کا مطالبہ کیا گیا۔

اداکار کے وکیل نے کہا ہے کہ عمران خان اس حکم کو بمبئی ہائی کورٹ میں چیلنج کریں گے۔

پولیس کے مطابق، فارنرز ریجنل رجسٹریشن آفس (FRRO) نے احتجاج میں شرکت کے ذریعے قوانین کی خلاف ورزی کرنے پر عمران خان کو نوٹس جاری کیا تھا۔

تاہم، اداکار کے وکیل کا مؤقف ہے کہ قانون کی کوئی شق یا او سی آئی کارڈ ہولڈرز کے لیے کوئی ضابطہ انہیں احتجاج میں شرکت سے منع نہیں کرتا۔

پریس ٹرسٹ آف انڈیا (PTI) کے مطابق، عمران خان نے ممبئی پولیس کے نوٹس کے خلاف اپنی درخواست میں اس اقدام کو ’’انتہائی سخت‘‘ قرار دیا ہے۔

عمران خان کون ہیں؟

عمران خان 2008ء میں ریلیز ہونے والی کامیاب رومانوی کامیڈی فلم جانے تو… یا جانے نا سے شہرت حاصل کر چکے ہیں۔

انہوں نے بطور چائلڈ ایکٹر 1988ء میں فلم قیامت سے قیامت تک اور 1992ء میں جو جیتا وہی سکندر جیسی مقبول فلموں میں کام کیا۔

2008ء میں مرکزی اداکار کے طور پر اپنے کیریئر کا آغاز کرنے کے بعد انہوں نے آئی ہیٹ لو اسٹوریز، میرے برادر کی دلہن اور دہلی بیلی سمیت متعدد فلموں میں اداکاری کی۔