گورنر سندھ نہال ہاشمی نے ملت ایکسپریس کا افتتاح کردیا، گورنر راج کو آئینی معاملہ قرار دے دیا

گورنر سندھ سید محمد نہال ہاشمی نے ملت ایکسپریس کا افتتاح کردیا۔ اس موقع پر انہوں نے کہا کہ پاکستان ریلوے کے لیے آج اہم دن ہے اور نئی ٹرین سروس کا آغاز خوش آئند ہے۔ ریلوے میں پبلک پرائیویٹ پارٹنرشپ کا فروغ قابلِ تحسین ہے۔

گورنر سندھ نے وزیراعظم اور وزیر ریلوے کو ریلوے نظام کی بہتری کے لیے اقدامات پر مبارک باد دیتے ہوئے کہا کہ پاکستان ریلوے مختلف شعبوں اور علاقوں کو آپس میں جوڑنے کا اہم ذریعہ ہے۔ ریلوے کی املاک اور سامان کی حفاظت ہم سب کی مشترکہ ذمہ داری ہے۔

سید محمد نہال ہاشمی نے بتایا کہ کراچی سے روہڑی تک رواں سال نئی پٹریاں بچھائی جارہی ہیں۔ انہوں نے کہا کہ ریلوے حادثات ہمیشہ تکلیف دہ ہوتے ہیں، اس لیے حادثات کی شرح کم کرنے کے لیے مؤثر اقدامات ضروری ہیں۔ تمام متعلقہ افراد اپنی ذمہ داریاں احسن طریقے سے ادا کریں۔

گورنر راج آئینی معاملہ ہے، کسی ایک فرد کے لیے پورے صوبے کو داؤ پر نہیں لگایا جاسکتا، نہال ہاشمی

گورنر سندھ نے گورنر راج سے متعلق میڈیا کے سوال کے جواب میں کہا کہ گورنر راج ایک آئینی معاملہ ہے اور کسی ایک فرد کے لیے پورے صوبے کو داؤ پر نہیں لگایا جاسکتا۔

انہوں نے کہا کہ سیاست کریں، انتشار نہ پھیلائیں اور آئین سے ہٹ کر کوئی اقدام نہیں ہونا چاہیے۔ عوام نے ووٹ صوبے کی ترقی اور مسائل کے حل کے لیے دیا ہے۔

سید محمد نہال ہاشمی کا کہنا تھا کہ ریاست عوامی مفادات کو نقصان پہنچنے کی صورت میں خاموش تماشائی نہیں بن سکتی۔ عمارتوں اور املاک کو نقصان پہنچانا قائداعظم کے اصولوں کے منافی ہے۔

گورنر سندھ نے مزید کہا کہ حکمرانوں کی ذمہ داری عوام کے حالات بہتر بنانا ہے