پاکستانی خلا باز شین ژو-24 مشن پر چین کے خلائی اسٹیشن جائے گا

چینی سرکاری میڈیا نے ہفتے کو بتایا کہ ایک پاکستانی خلا باز رواں سال شین ژو-24 مشن کے ذریعے چین کے خلائی اسٹیشن جائے گا۔ یہ پرواز بیجنگ کے بیلٹ اینڈ روڈ انیشی ایٹو کے تحت دونوں ملکوں کے درمیان تعاون کا حصہ ہے۔

سی سی ٹی وی نے چین کی انسانی خلائی پروازوں کی ایجنسی کے حوالے سے بتایا کہ پاکستانی خلا باز بطور پے لوڈ اسپیشلسٹ (سائنسی آلات اور تجربات کے ماہر) مشن میں حصہ لے گا اور اسٹیشن کا دورہ کرنے والا پہلا غیر ملکی ہوگا۔

چین نے خلا باز کا نام نہیں بتایا۔ ستمبر میں پاکستان کے خلائی ادارے کے ایک عہدیدار نے رائٹرز کو بتایا تھا کہ پائلٹس ذیشان علی اور خرم داؤد کئی ماہ سے بیجنگ کے چائنا آسٹروناٹ ریسرچ اینڈ ٹریننگ سینٹر میں اس مشن کی تربیت لے رہے ہیں۔

بیجنگ نے مشن کی تاریخ بھی نہیں بتائی۔

سی سی ٹی وی کے مطابق مدار میں مختصر قیام کے بعد خلا باز شین ژو-23 خلائی جہاز میں زمین پر لوٹے گا۔

چین کے انسانی خلائی پروگرام کی تاریخ میں یہ پہلی مشترکہ پرواز ہوگی جس میں چینی اور غیر ملکی خلا باز ساتھ ہوں گے۔ یہ بیجنگ کی خلائی سفارت کاری کا حصہ ہے، اور اسے پاکستان کے ساتھ خلائی تعاون میں اہم پیش رفت قرار دیا جا رہا ہے۔