گوگل تھنک ایپس 2026 میں پاکستانی ایپ انڈسٹری کی ترقی نمایاں

لاہور، پاکستان — گوگل کے زیرِ اہتمام لاہور میں منعقد ہونے والے تھنک ایپس پاکستان 2026 میں پاکستان کی ایپ اور گیمنگ انڈسٹری کی عالمی سطح پر بڑھتی ہوئی رسائی کو اجاگر کیا گیا۔ تقریب میں مصنوعی ذہانت (AI) کے ذریعے مقامی ڈویلپرز کو عالمی منڈیوں کے لیے ڈیجیٹل مصنوعات تیار کرنے میں مدد دینے پر توجہ دی گئی۔

تقریب میں پیش کیے گئے اعداد و شمار کے مطابق، پاکستانی ڈویلپرز کی تیار کردہ ڈیجیٹل مصنوعات گزشتہ 12 ماہ کے دوران 4 ارب 60 کروڑ مرتبہ ڈاؤن لوڈ کی گئیں۔ پاکستان کی ایپ اور گیمنگ انڈسٹری، جو ابتدا میں 30 سے بھی کم افراد پر مشتمل تھی، اب 30 ہزار سے زائد پیشہ ور افراد کے لیے روزگار اور ترقی کے مواقع فراہم کر رہی ہے۔

گوگل پاکستان کے کلسٹر ڈائریکٹر فرحان قریشی نے کہا کہ پاکستانی ڈویلپرز کی عالمی سطح پر کامیابیاں ان کی صلاحیتوں اور بلند عزائم کی عکاسی کرتی ہیں۔ ان کے مطابق، گوگل کا مقصد ڈویلپرز کو مصنوعی ذہانت کی جدید سہولتوں سے لیس کرنا ہے تاکہ وہ ایسی مصنوعات تیار کر سکیں جو عالمی منڈیوں میں مقابلہ کرنے کے ساتھ پاکستان کی ڈیجیٹل معیشت کو بھی مضبوط بنائیں۔

گوگل کے وسیع تر ڈیجیٹل اقدامات میں 2028 تک ایک لاکھ ڈویلپرز کو مصنوعی ذہانت کی تربیت دینے کا ہدف بھی شامل ہے۔ دیگر اقدامات میں پاکستان میں سالانہ پانچ لاکھ تک کروم بکس تیار کرنے کی پیداواری صلاحیت کو فروغ دینا اور ڈیجیٹل پاسبان پروگرام شامل ہے، جس کا مقصد دو لاکھ گھرانوں تک آن لائن تحفظ سے متعلق رہنمائی اور تربیت پہنچانا ہے۔

تقریب میں پیش کیے گئے اعداد و شمار پاکستان کی ایپ اور گیمنگ انڈسٹری میں ڈیجیٹل برآمدات، روزگار اور معاشی ترقی کے امکانات کو نمایاں کرتے ہیں۔ مصنوعی ذہانت کی مہارتوں میں اضافہ اور پاکستانی ڈویلپرز کی عالمی منڈیوں تک رسائی اس شعبے کی ترقی کے اہم مواقع ہیں۔