سیکیورٹی فورسز کی قلات میں کارروائی، بھارتی سرپرستی میں سرگرم 4 دہشت گرد ہلاک، گوادر میں افسروطن پر قربان

انٹیلی جنس اداروں نے ضلع گوادر کی تحصیل پسنی کے علاقے شادی کور اور ضلع قلات کے علاقے جٹک آباد میں بھارتی سرپرستی میں سرگرم فتنہ الہندوستان کے متعدد ٹھکانوں کی موجودگی کی اطلاع دی تھی۔ ان ٹھکانوں سے مقامی آبادی کو خطرات لاحق تھے۔ مقامی آبادی کے تحفظ اور علاقے کو دہشت گردوں سے پاک کرنے کے لیے سیکیورٹی فورسز نے کارروائیاں شروع کیں۔ ضلع قلات میں 4 دہشت گرد ہلاک 18 اکتوبر 2026 کو سیکیورٹی فورسز نے ضلع قلات کے علاقے جٹک آباد میں انٹیلی جنس معلومات کی بنیاد پر آپریشن کیا۔ کارروائی کے دوران سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا۔ شدید فائرنگ کے تبادلے کے بعد 4 دہشت گرد ہلاک ہوگئے، جبکہ اسلحے اور گولہ بارود کی بڑی مقدار بھی برآمد کرلی گئی۔ ضلع گوادر میں کارروائی کے دوران میجر شہید

دوسری کارروائی ضلع گوادر کی تحصیل پسنی کے علاقے شادی کور میں کی گئی، جہاں سیکیورٹی فورسز نے علاقے کو دہشت گردوں سے پاک کرنے کے لیے متعدد کارروائیاں کیں۔ ایک کارروائی کے دوران میجر وجاہت وحید کی قیادت میں اگلے مورچوں پر موجود سیکیورٹی فورسز کے دستے کو دیسی ساختہ دھماکا خیز ڈیوائس (آئی ای ڈی) کے ذریعے نشانہ بنایا گیا۔ دھماکے کے نتیجے میں 34 سالہ میجر وجاہت وحید، ساکن لاہور، وطن کے دفاع میں جان قربان کرتے ہوئے شہادت کے مرتبے پر فائز ہوگئے۔ علاقے میں کلیئرنس آپریشن جاری رکھنے کا اعلان

سیکیورٹی فورسز کے مطابق علاقے میں موجود دیگر دہشت گردوں کے خاتمے کے لیے کلیئرنس آپریشنز جاری رہیں گے۔ قومی ایکشن پلان پر عمل درآمد کے لیے وفاقی ایپکس کمیٹی کی منظور کردہ حکمت عملی عزمِ استحکام کے تحت دہشت گردی کے خلاف کارروائیاں پوری رفتار سے جاری رکھنے کے عزم کا اعادہ کیا گیا ہے۔ سیکیورٹی فورسز اور قانون نافذ کرنے والے اداروں نے ملک سے بیرونی سرپرستی اور حمایت یافتہ دہشت گردی کے خاتمے کے لیے اپنے عزم کا اظہار کیا ہے۔