پیٹرول اور ڈیزل مہنگا ہوتا گیا، تیل کے شعبے کی پاکستانی کمپنیوں کے منافع اربوں میں

ایسے وقت میں جب پاکستانی صارفین مہنگے پیٹرول اور ڈیزل کا بوجھ اٹھا رہے ہیں، ملک کی کئی آئل ریفائنریوں، تیل و گیس تلاش کرنے والی کمپنیوں اور آئل مارکیٹنگ کمپنیوں نے منافع میں نمایاں اضافے کی اطلاع دی ہے۔

ریفائنریوں کا منافع گزشتہ سال کے مقابلے میں ایک ہزار فیصد سے بھی زیادہ بڑھ گیا ہے۔

امریکا اور اسرائیل کی ایران کے خلاف جنگ اور اس سے آبنائے ہرمز میں پیدا ہونے والی رکاوٹوں نے عالمی توانائی منڈیوں میں بے یقینی پیدا کی۔ اس دوران خام تیل، ڈیزل اور دیگر پیٹرولیم مصنوعات کی عالمی قیمتیں بڑھیں، جس کا اثر پاکستان میں بھی محسوس ہوا۔

عالمی توانائی تجارت کا تقریباً پانچواں حصہ (20 فیصد) آبنائے ہرمز سے گزرتا ہے۔ اسی لیے اس اہم بحری راستے پر کشیدگی سے عالمی سپلائی چین متاثر ہوئی اور پاکستان سمیت کئی ممالک میں تیل اور ایندھن کی قیمتیں چڑھ گئیں۔

جنگ سے پہلے پاکستان میں پیٹرول اور ڈیزل بالترتیب تقریباً 276 روپے اور 287 روپے فی لیٹر تھے۔ بعد میں عالمی اور ملکی منڈی دونوں میں قیمتیں تیزی سے بڑھیں اور 400 روپے فی لیٹر تک جا پہنچیں۔

اس غیر معمولی صورتِ حال میں حکومت نے پیٹرولیم مصنوعات کی قیمتیں روزانہ طے کرنا شروع کر دیں، جبکہ مہنگے ایندھن کا اثر روزمرہ استعمال کی کئی اشیا کی قیمتوں میں بھی نظر آیا۔

ادارۂ شماریات پاکستان کے مطابق فروری میں مہنگائی کی شرح سات فیصد تھی، جو بعد میں بڑھ کر 11 فیصد تک پہنچ گئی۔

تاہم پاکستان کی بڑی ریفائنریوں اور تیل سے وابستہ دیگر کمپنیوں کے مالی نتائج اس سے بالکل مختلف کہانی سناتے ہیں۔