پی آئی اے کا پہلا بوئنگ 787 ڈریم لائنر پاکستان پہنچ گیا

پاکستان انٹرنیشنل ایئرلائنز (پی آئی اے) کا لیز پر حاصل کردہ پہلا بوئنگ 787 ڈریم لائنر طیارہ پاکستان پہنچ گیا۔ جدید ترین طیارے نے لندن سے پرواز پی کے 786 کے طور پر اسلام آباد ایئرپورٹ پر لینڈنگ کی۔

یہ طیارہ پاکستان کی کسی بھی ایئرلائن کے فضائی بیڑے میں شامل ہونے والا اپنی نوعیت کا پہلا بوئنگ 787 ڈریم لائنر ہے۔

پی آئی اے کے چیف ایگزیکٹو آفیسر ایئر وائس مارشل عامر حیات نے اپنی ٹیم کے ہمراہ اسلام آباد ایئرپورٹ پر پہلے ڈریم لائنر کا استقبال کیا۔

بوئنگ 787 ڈریم لائنر جدید فضائی ٹیکنالوجی سے لیس ہے، جس میں دورانِ پرواز تفریح کی سہولیات اور کشادہ و آرام دہ کیبن شامل ہیں۔ طیارے کو مسافروں کے لیے زیادہ آرام دہ اور بہتر سفری تجربہ فراہم کرنے کے لیے ڈیزائن کیا گیا ہے۔

پی آئی اے حکام کے مطابق ڈریم لائنر کی شمولیت قومی ایئرلائن کے فضائی بیڑے کو جدید خطوط پر استوار کرنے اور بین الاقوامی فضائی نیٹ ورک کو مزید مضبوط بنانے کی حکمت عملی کا حصہ ہے۔

جدید طیاروں کی شمولیت کے ذریعے پی آئی اے کا مقصد بین الاقوامی معیار کے مطابق سفری سہولیات فراہم کرنا، مسافروں کے آرام میں اضافہ کرنا اور بین الاقوامی فضائی آپریشنز کو مزید بہتر بنانا ہے۔