اساتذہ کا کراچی پریس کلب پر احتجاج، وزیراعلیٰ ہاؤس جانے کی کوشش ناکام، پولیس کی شیلنگ اور واٹر کینن کا استعمال

آل سندھ پرائمری ٹیچرز ایسوسی ایشن کے تحت اساتذہ نے کراچی پریس کلب کے باہر اپنے مطالبات کے حق میں احتجاج کیا۔ مظاہرین نے وزیراعلیٰ ہاؤس جانے کی کوشش کی تو پولیس نے انہیں روکنے کے لیے کارروائی کرتے ہوئے شیلنگ اور واٹر کینن کا استعمال کیا۔

پولیس کارروائی کے دوران اساتذہ کمیٹی کے مرکزی صدر غلام رسول مہر کو حراست میں لے لیا گیا، جبکہ وزیراعلیٰ ہاؤس جانے کی کوشش کرنے والے متعدد دیگر اساتذہ کو بھی گرفتار کرلیا گیا۔

پولیس کی کارروائی کے بعد مظاہرین منتشر ہوکر دوبارہ کراچی پریس کلب پہنچ گئے۔ احتجاج کے باعث ریڈ زون اور وزیراعلیٰ ہاؤس جانے والے راستوں پر سیکیورٹی کے سخت انتظامات کیے گئے تھے۔

احتجاج کرنے والے اساتذہ کا مطالبہ تھا کہ انہیں ابتدائی تقرری کی تاریخ سے مستقل کیا جائے اور اساتذہ کے تبادلوں کا اختیار سندھ سیکریٹریٹ کے بجائے ضلعی سطح پر بحال کیا جائے۔

مظاہرین نے کلسٹر حب پالیسی ختم کرنے اور کئی سال سے زیرالتوا اساتذہ کے گریڈ اپ گریڈ کرنے کا بھی مطالبہ کیا۔ اساتذہ نے کلسٹر حب پالیسی کے تحت چھوٹے سرکاری اسکولوں کو بڑے اسکولوں میں ضم کرنے کی مخالفت بھی کی۔

دوسری جانب احتجاج کے باعث ایم آر کیانی روڈ کے دونوں ٹریک ٹریفک کے لیے بند کردیے گئے جس سے فوارہ چوک، دین محمد وفائی روڈ اور سرور شہید روڈ پر بدترین ٹریفک جام ہوگیا اور گاڑیوں کی قطاریں لگ گئیں

ٹریفک پولیس کے مطابق ٹریفک کو ایوان صدر روڈ اور زینب مارکیٹ کی جانب متبادل راستوں سے گزارا جاتا رہا، جبکہ وزیراعلیٰ ہاؤس جانے والے راستوں پر پولیس کی بھاری نفری تعینات رہی۔