خیبرپختونخوا میں پی ٹی آئی کے دورِ حکومت میں محکمہ تعلیم میں مبینہ مالی بے ضابطگیوں کا انکشاف ہوا

خیبرپختونخوا میں پی ٹی آئی کے دورِ حکومت میں محکمہ تعلیم میں مبینہ مالی بے ضابطگیوں کا انکشاف ہوا ہے،

آڈٹ رپورٹ کے مطابق نئے بھرتی ہونے والے اساتذہ کو ٹیبلٹس کی فراہمی میں 37 کروڑ 43 لاکھ روپے کی مبینہ بے ضابطگیاں سامنے آئیں۔اس عرصے میں صوبائی وزیرِ تعلیم شہرام ترکئی تھے۔15 ہزار افراد میں 42 کروڑ 47 لاکھ روپے کے ٹیبلٹس تقسیم کیے گئے۔

تحقیقات کے لیے کمیٹی بنائی گئی، تاہم اسکروٹنی کمیٹی کے مطابق صرف ایک ہزار 779 ٹیبلٹس واپس ہوئے، جبکہ 13 ہزار 221 ٹیبلٹس کا سراغ نہ مل سکا۔

مالی سال 2022-23 کے دوران بورڈ آف انٹرمیڈیٹ اینڈ سیکنڈری ایجوکیشن مردان میں کاغذ کی خریداری میں 4 کروڑ 87 لاکھ روپے کی بے ضابطگیاں رپورٹ ہوئیں۔

آڈٹ رپورٹ کے مطابق قواعد کی خلاف ورزی کرتے ہوئے من پسند فرم کو ٹھیکہ دینے سے قومی خزانے کو 19 کروڑ 20 لاکھ روپے کا نقصان پہنچا۔ بورڈ چیئرمین کی جانب سے ایگزیکٹو الاؤنس کی مد میں 71 لاکھ روپے وصول کرنے کی بھی نشاندہی کی گئی، جن کے وہ مجاز نہیں تھے۔

رپورٹ میں اسمارٹ فونز کی خریداری میں بھی ایک کروڑ 30 لاکھ روپے کی مبینہ بے ضابطگیوں کی نشاندہی کی گئی ہے۔ان مالی بے ضابطگیوں کی تفصیلات نے سرکاری محکموں میں شفافیت اور احتساب سے متعلق اہم سوالات اٹھا دیے ہیں۔

مجموعی طور پر ایک سال کے دوران 92 کروڑ روپے سے زائد کی بے ضابطگیاں رپورٹ ہوئیں۔