صومالیہ واقعے میں جاں بحق و زخمی پاکستانیوں کی وطن واپسی، گورنر سندھ کا اظہارِ تعزیت

گورنر سندھ کی جانب سے جاری بیان میں کہا گیا ہے کہ صومالیہ واقعے میں جاں بحق پاکستانیوں کے جسدِ خاکی اور زخمی ہم وطنوں کی وطن واپسی پر پوری قوم غمزدہ ہے۔

گورنر سندھ کے مطابق وزیراعظم محمد شہباز شریف نے صومالیہ سانحے کو ابتدا ہی سے ذاتی طور پر فالو کیا اور وطن واپسی کے تمام مراحل کی مسلسل نگرانی کی۔

بیان میں بتایا گیا ہے کہ وزیراعظم نے متاثرہ خاندانوں کے لیے فی خاندان ایک کروڑ 25 لاکھ روپے مالی معاونت، بچوں کے تعلیمی و صحت کے اخراجات کی ادائیگی اور ایک گھر دینے کا اعلان کیا ہے۔

گورنر سندھ کا کہنا ہے کہ وزیراعظم کی خصوصی ہدایات پر متعلقہ وزارتوں، سفارتی حکام اور اداروں نے دن رات کام کرکے جاں بحق پاکستانیوں کے جسدِ خاکی اور زخمیوں کو وطن واپس پہنچایا۔

بیان کے مطابق حکومت متاثرہ خاندانوں کو اس مشکل گھڑی میں تنہا نہیں چھوڑے گی اور زخمیوں کو بہترین طبی نگہداشت سمیت ہر ممکن معاونت فراہم کی جائے گی۔