مولانا فضل الرحمن کے فوج مخالف بیانیے کی مذمت کرتے ہیں، پاکستان کی سلامتی اور خودمختاری ہر چیز سے مقدم ہے: سید مصطفیٰ کمال

وفاقی وزیر صحت و ایم کیو ایم پاکستان کے سینئر مرکزی رہنما سید مصطفیٰ کمال نے نجی ٹی وی کے پروگرام میں گفتگو کرتے ہوئے کہا ہے کہ ان کی جماعت مولانا فضل الرحمن کے فوج مخالف بیانیے سے اختلاف کرتی ہے اور اس کی مذمت کرتی ہے۔ پاکستان کی سلامتی اور خودمختاری ہر چیز سے مقدم ہے، جبکہ انتظامی یونٹس کا قیام عوام کو بااختیار بنانے اور ملک کی بقا کے لیے ضروری ہے۔

سید مصطفیٰ کمال کا کہنا تھا کہ ابتدا میں مولانا فضل الرحمن کے بیانات کو وقتی ناراضی سمجھا، لیکن مسلسل ایسے مؤقف کے اظہار کے بعد اپنی اور جماعت کی پوزیشن واضح کرنا ضروری ہوگیا ہے۔ انہوں نے کہا کہ سیاسی اختلاف اپنی جگہ، تاہم ملکی سلامتی کے ضامن اداروں کو کمزور کرنے کے نتائج سنگین ہو سکتے ہیں۔

کراچی اور اختیارات کی منتقلی

کراچی کے مسائل اور اختیارات کی عدم منتقلی پر گفتگو کرتے ہوئے انہوں نے کہا کہ ایم کیو ایم پاکستان کے پاس کراچی میں 22 نشستیں ہونے کے باوجود اس کے نمائندے کراچی اور حیدرآباد میں پانی کا ایک کنکشن لگوانے کا اختیار بھی نہیں رکھتے۔ انہوں نے سوال اٹھایا کہ جب منتخب نمائندے اپنے حلقوں میں بنیادی سہولیات فراہم کرنے کے لیے بھی بے اختیار ہوں تو وہ عوام کو کیا جواب دیں؟

سید مصطفیٰ کمال نے کہا کہ پولیس، بیوروکریسی اور متعلقہ ادارے صوبائی حکومت کے ماتحت ہیں، لیکن شہری پانی، تعلیم، صحت اور روزگار جیسی بنیادی سہولیات سے محروم ہیں۔ ان کا کہنا تھا کہ عوامی مسائل کے حل کے لیے وسائل اور اختیارات کو نچلی سطح تک منتقل کرنا ہوگا۔

کراچی کی مردم شماری کا حوالہ دیتے ہوئے انہوں نے الزام عائد کیا کہ شہر کی آبادی کم ظاہر کی گئی، جس سے اس کی نمائندگی اور وسائل متاثر ہوئے۔ انہوں نے کہا کہ کراچی کے شہریوں کو درست گنتی، جائز وسائل اور مؤثر نمائندگی ملنی چاہیے۔

وفاقی وزیر صحت نے کہا کہ ایم کیو ایم پاکستان ایک جمہوری سیاسی جماعت ہے اور عوام کی محرومیوں کا حل پاکستان کے آئینی و ریاستی نظام کے اندر چاہتی ہے۔ انہوں نے کہا کہ شہریوں کی شکایات کا ازالہ کرنا اور انہیں فیصلہ سازی میں شریک کرنا ریاست اور حکومت کی ذمہ داری ہے۔