’’یہ ایک تباہ کن شکست ہے‘‘، مڈٹرم انتخابات میں ناکامی پر ناراض ریپبلکنز نے ٹرمپ کو ذمہ دار ٹھہرا دیا۔

امریکی ریپبلکن پارٹی کے اندر منگل کی شب سامنے آنے والے حیران کن انتخابی نتائج پر ابتدائی صدمہ جلد ہی صدر ڈونلڈ ٹرمپ کے خلاف غصے میں تبدیل ہوگیا۔

ٹیکساس، کنساس اور جنوبی کیرولائنا جیسی روایتی طور پر ریپبلکنز کے مضبوط سمجھے جانے والے حلقوں میں ڈیموکریٹس کی یکے بعد دیگرے غیر متوقع کامیابیوں کے بعد ریپبلکن پارٹی کے بعض رہنماؤں نے شکست کا ذمہ دار صدر ٹرمپ کو قرار دیا ہے۔ ان کا مؤقف ہے کہ ٹرمپ کی توجہ اپنے سیاسی ورثے کو محفوظ بنانے پر مرکوز رہی، جبکہ انہوں نے ووٹرز کے مسائل اور تحفظات کو نظرانداز کیا، جس کے نتیجے میں پارٹی کانگریس پر اپنا کنٹرول برقرار رکھنے میں ناکام رہی۔

ٹیکساس سے تعلق رکھنے والے ریپبلکن پارٹی کے اہم لابیسٹ بل ملر نے بی بی سی سے گفتگو کرتے ہوئے کہا:

’’اس شکست کی ذمہ داری صرف ٹرمپ پر عائد ہوتی ہے، کسی اور پر نہیں۔ یہ صدر ٹرمپ کو مکمل طور پر مسترد کرنے کے مترادف ہے۔ یہ انتہائی بڑے پیمانے کی تباہی ہے، کسی نے بھی ایسے نتائج کی توقع نہیں کی تھی۔‘‘

زیادہ تر ریپبلکنز کو ایوانِ نمائندگان (ہاؤس آف ریپریزنٹیٹوز) کا کنٹرول کھونے کا خدشہ پہلے ہی تھا، جبکہ مشکل انتخابی ماحول میں سینیٹ کا کنٹرول برقرار رکھنا بھی ان کے لیے ایک بڑا چیلنج سمجھا جا رہا تھا۔ تاہم بعض ریپبلکن رہنماؤں نے انٹرویوز میں کہا کہ ٹرمپ کی غیر مقبول پالیسیاں، عوام میں ان کی گرتی ہوئی مقبولیت اور واشنگٹن میں تعمیراتی منصوبوں پر غیر معمولی توجہ نے پارٹی کی انتخابی پوزیشن کو مزید کمزور کیا۔

ریاست مینیسوٹا سے تعلق رکھنے والے ریپبلکن سیاسی حکمت عملی کے ماہر گریگ پیپن نے کہا:

’’یہ ایک کے بعد ایک غلطی کا نتیجہ تھا۔ واضح طور پر مختلف ریاستوں میں لوگوں نے صدر کی پالیسیوں کو پسند نہیں کیا۔‘‘

وائٹ ہاؤس کے ایک اتحادی کے مطابق ایران جنگ، درآمدی محصولات (ٹیرف) اور ٹرمپ انتظامیہ کی امیگریشن کے خلاف سخت کارروائیوں پر عوامی ناراضی نے نومبر میں ایک ایسی صورتحال پیدا کردی جس نے ریپبلکن پارٹی کو شدید نقصان پہنچایا۔