ٹرمپ کا دعویٰ: ایران کے ساتھ جنگ بہت جلد ختم ہو سکتی ہے

امریکی صدر ڈونلڈ ٹرمپ نے دعویٰ کیا ہے کہ امریکا ایران کے ساتھ جاری جنگ بہت جلد ختم کر سکتا ہے۔ ساتھ ہی انھوں نے سوال اٹھایا کہ تنازع کو فوراً ختم کیا جائے یا ایران کو وقت کے ساتھ مزید کمزور ہونے دیا جائے۔

ٹرمپ وائٹ ہاؤس سے فلوریڈا کے لیے روانہ ہوتے وقت صحافیوں سے بات کر رہے تھے۔ انھوں نے ایران کو ’’زوال پذیر ملک‘‘ کہا اور بتایا کہ وہ مہنگائی سے دوچار ہے اور اس کے پاس پیسہ نہیں ہے۔

انھوں نے آبنائے ہرمز پر امریکی کنٹرول کا دعویٰ دہراتے ہوئے کہا کہ امریکا اس اہم بحری راستے سے جتنا چاہے تیل لے سکتا ہے۔ ان کے مطابق امریکی بحریہ نے ایران کے لیے یہ راستہ بند کر رکھا ہے، جبکہ دوسرے ممالک اسی راستے سے اپنا تیل بھیج رہے ہیں۔

امریکی صدر نے کہا کہ اب فیصلہ یہ کرنا ہے کہ معاملہ ایک بار میں نمٹا دیا جائے یا ایران کو آہستہ آہستہ مزید کمزور اور ناتواں ہونے دیا جائے۔

صدر نے جنگ جلد ختم ہونے کا اشارہ تو دیا، مگر نہ کوئی واضح وقت بتایا اور نہ جنگ ختم کرنے کی کسی حکمتِ عملی کی تفصیل۔