امریکا کا سعودی عرب اور خلیجی ممالک میں سفارتی عملے کے اہلِ خانہ کو واپس بلانے کا فیصلہ

امریکی محکمہ خارجہ نے سعودی عرب میں تعینات بعض سفارت کاروں اور ان کے اہلِ خانہ کو سعودی عرب چھوڑنے کا حکم دے دیا ہے، جبکہ خلیجی خطے میں قائم متعدد دیگر امریکی سفارتی مشنز سے بھی اہلِ خانہ کو واپس بلانے کی تیاری کی جا رہی ہے۔ امریکی حکام نے خبر رساں ادارے رائٹرز کو بتایا کہ یہ فیصلہ خطے میں سیکیورٹی خدشات کے پیشِ نظر کیا گیا ہے۔

امریکی محکمہ خارجہ کے ترجمان ٹامی پگٹ نے سوشل میڈیا پلیٹ فارم ایکس پر جاری بیان میں کہا کہ سعودی عرب میں صرف غیر ہنگامی امور پر مامور امریکی سرکاری ملازمین اور ان کے اہلِ خانہ کو ملک چھوڑنے کا حکم دیا گیا ہے۔ یہ اقدام یمن میں ایران کے حمایت یافتہ حوثیوں کی جانب سے سعودی عرب میں شہری اہداف پر حملوں کے تناظر میں کیا گیا ہے۔

ٹامی پگٹ کے مطابق ایران کے حمایت یافتہ حوثی گروپ نے سعودی عرب کے خلاف اپنی کارروائیاں تیز کر دی ہیں، جن میں شہری ہوائی اڈوں اور دیگر اہم تنصیبات کو نشانہ بنانا شامل ہے۔ ان حملوں کے نتیجے میں شہری ہلاکتیں اور سفری نظام میں شدید خلل پیدا ہوا ہے۔

رائٹرز کے مطابق چار امریکی حکام نے بتایا کہ خلیجی خطے کی دیگر ریاستوں میں قائم امریکی سفارتی مشنز سے بھی اہلِ خانہ کو روانہ ہونے کی ہدایت دی جائے گی۔ تاہم امریکی محکمہ خارجہ کے ترجمان نے سعودی عرب کے علاوہ دیگر سفارتی مشنز میں تبدیلیوں کی تصدیق یا تفصیلات فراہم نہیں کیں۔

دوسری جانب ریاض میں امریکی سفارت خانے نے بدھ کے روز سیکیورٹی الرٹ جاری کرتے ہوئے سعودی عرب پر حوثیوں کے مزید ممکنہ حملوں سے خبردار کیا۔ اس سے قبل ہونے والے مہلک حملوں میں ریاض کے ہوائی اڈے کو بھی نشانہ بنایا گیا تھا۔

واضح رہے کہ فروری کے اواخر میں ایران کے خلاف امریکی اور اسرائیلی جنگ شروع ہونے کے بعد تہران کی جانب سے امریکی تنصیبات پر جوابی حملوں کے نتیجے میں متعدد امریکی سفارتی اہلکاروں کو خطے سے واپس بلایا گیا تھا۔ حالیہ مہینوں میں امریکا نے بعض سفارتی اہلکاروں کو دوبارہ خطے میں تعینات کیا تھا۔