پولیو کے مکمل خاتمے تک بہتری بے معنی ہے، مصطفیٰ کمال

وفاقی وزیرِ صحت مصطفیٰ کمال نے چیف سیکرٹری سندھ سید آصف حیدر سے چیف سیکرٹری ہاؤس کراچی میں ملاقات کی، جس میں سندھ میں پولیو کے خاتمے، حفاظتی ٹیکہ جات کی فراہمی اور بچوں کی صحت سے متعلق مختلف امور پر تبادلہ خیال کیا گیا۔ اجلاس میں جوائنٹ سیکرٹری (FC&I) انور الحق نے اسلام آباد سے آن لائن شرکت کی۔

اجلاس کے دوران مصطفیٰ کمال نے زور دیا کہ بچوں کی پیدائش کے اندراج (برتھ رجسٹریشن) کے وقت ہی پولیو ویکسینیشن اور دیگر حفاظتی ٹیکہ جات کی فراہمی پر خصوصی توجہ دی جائے تاکہ کوئی بچہ حفاظتی ٹیکوں سے محروم نہ رہے۔

اجلاس میں پولیو وائرس کے پھیلاؤ کی روک تھام کے لیے ماحولیاتی نگرانی (Environmental Surveillance) کی اہمیت پر بھی گفتگو ہوئی، جبکہ سندھ کے 114 بنیادی مراکز صحت (BHUs) کے ذریعے حفاظتی ٹیکہ جات کی سہولیات مزید بہتر بنانے کے اقدامات کا جائزہ لیا گیا۔

اس موقع پر چیف سیکرٹری سندھ سید آصف حیدر نے کہا کہ پولیو وائرس ایک چیلنجنگ وائرس ہے جو ارتقائی عمل سے گزرتا ہے، اس لیے اس کے مکمل خاتمے کے لیے موجودہ حکمت عملی کو مزید مؤثر بنانے کی ضرورت ہے۔

اجلاس میں بچوں کی نشوونما میں رکاوٹ (Stunted Growth) اور ماؤں میں غذائی قلت (Maternal Malnutrition) جیسے اہم صحت کے مسائل بھی زیرِ بحث آئے۔ شرکاء نے بچوں اور ماؤں کی صحت بہتر بنانے کے لیے مربوط اقدامات کی ضرورت پر زور دیا۔