ایم کیو ایم پاکستان کا وزیراعلیٰ سندھ مراد علی شاہ سے فوری استعفے کا مطالبہ

کراچی: متحدہ قومی موومنٹ پاکستان نے وزیراعلیٰ سندھ مراد علی شاہ سے فوری استعفے کا مطالبہ کرتے ہوئے کہا ہے کہ کراچی سے کشمور تک دھول اڑ رہی ہے، تاہم وزیراعلیٰ سندھ سات سال میں اربوں روپے خرچ کرنے کے باوجود یونیورسٹی روڈ مکمل نہیں کرا سکے۔

ایم کیو ایم پاکستان کے ترجمان نے اپنے بیان میں کہا کہ نئے صوبوں کے قیام کی تحریک نے پیپلز پارٹی کو حواس باختہ کردیا ہے۔ مصطفیٰ کمال کے خلاف جھوٹے اور سازشی پروپیگنڈے سے ثابت ہوتا ہے کہ پیپلز پارٹی ان سے خوفزدہ ہے۔

ترجمان ایم کیو ایم پاکستان نے مزید کہا کہ پیپلز پارٹی کو مشورہ ہے کہ وہ اپنی ناکامیوں اور حسرتوں پر آنسو بہا کر سو جائے۔

انہوں نے کہا کہ سندھ کے عوام بنیادی سہولیات اور ترقیاتی منصوبوں کی تکمیل کے منتظر ہیں، جبکہ صوبائی حکومت عوامی مسائل حل کرنے میں ناکام دکھائی دیتی ہے۔