کراچی: سرسید ٹاؤن میں معمر میاں بیوی کی لاشیں برآمد، تیز دھار آلے سے قتل کا شبہ

کراچی کے علاقے سرسید ٹاؤن میں ایک مکان سے معمر میاں بیوی کی لاشیں برآمد ہوئی ہیں۔ ابتدائی اطلاعات کے مطابق دونوں کو تیز دھار آلے سے قتل کیے جانے کا شبہ ہے، جبکہ پولیس نے واقعے کی تحقیقات شروع کر دی ہیں۔

پولیس ترجمان کے مطابق لاشیں بی اماں پارک، سیکٹر 11-C1، مکان نمبر R-23 سے برآمد ہوئیں۔ واقعے کی اطلاع ملنے پر ایس ڈی پی او خواجہ اجمیر نگری، ایس ایچ او تھانہ سرسید، پولیس نفری اور کرائم سین یونٹ موقع پر پہنچ گئے۔

جاں بحق ہونے والے میاں بیوی کی شناخت محمد یامین ولد خدا بخش اور نفیس اختر کے نام سے ہوئی ہے۔ دونوں کی عمریں تقریباً 65 سے 70 سال کے درمیان بتائی جاتی ہیں۔

ابتدائی معلومات کے مطابق میاں بیوی کچھ عرصہ قبل کینیڈا سے پاکستان منتقل ہوئے تھے اور مذکورہ مکان میں رہائش پذیر تھے۔

پولیس اور کرائم سین یونٹ نے جائے وقوعہ سے شواہد اکٹھے کرنے کا عمل شروع کر دیا ہے۔ حکام کے مطابق واقعے کی وجوہات، قتل کے ممکنہ محرکات اور دیگر پہلوؤں کا تعین کرنے کے لیے مزید تحقیقات اور تفتیش جاری ہے۔