کراچی پولیس کی کارروائی، ملازمت کے انٹرویو کا جھانسہ دے کر 59 لڑکیوں کے موبائل فون ہتھیانے والا مرکزی ملزم گرفتار

گڈاپ سٹی پولیس نے ملازمت اور انٹرویو کا جھانسہ دے کر 59 لڑکیوں کے موبائل فون لے کر فرار ہونے والے مبینہ مرکزی ملزم کو گرفتار کرلیا۔

ملیر ڈسٹرکٹ پولیس کے مطابق یکم اکتوبر 2026 کو کراچی کے مختلف علاقوں سے تقریباً 59 لڑکیوں کو بحریہ ٹاؤن میں ایک سرگرمی سے منسلک تقریب میں ملازمت اور انٹرویو کا جھانسہ دے کر گڈاپ سٹی میں واقع انصاری میڈوز فارم ہاؤس، نزد بقائی کیڈٹ کالج، بلایا گیا تھا۔

مرکزی ملزم کی شناخت بابر عرف سلمان ساحل کے نام سے ہوئی ہے۔ پولیس کے مطابق ملزم نے اپنا نام ساحل سلمان ظاہر کیا اور لڑکیوں کے موبائل فون جمع کرنے کے بعد تمام فون لے کر فارم ہاؤس سے فرار ہوگیا۔

واقعے کے بعد گڈاپ سٹی پولیس نے فارم ہاؤس بک کرانے والے وقاص اور خاتون کوآرڈینیٹر نرگس کو گرفتار کرلیا تھا۔ بعد ازاں دو مزید ملزمان شہزاد خان اور مونو عرف عاشق حسین کو بھی گرفتار کیا گیا۔

پولیس کا کہنا ہے کہ انسانی ذرائع سے حاصل ہونے والی خفیہ معلومات اور تکنیکی نگرانی کی بنیاد پر کارروائی کرتے ہوئے مفرور مرکزی ملزم کو گرفتار کیا گیا۔

کارروائی کے دوران ملزم کے قبضے سے 40 موبائل فون اور ایک پستول برآمد ہوا۔ پولیس کے مطابق ملزم مبینہ طور پر یہ موبائل فون فروخت کرنے کے لیے لے جا رہا تھا۔

پولیس کے مطابق بابر اس واردات کا مبینہ مرکزی منصوبہ ساز ہے، جس نے مبینہ طور پر ایک فلم دیکھ کر واردات کی منصوبہ بندی کی تھی۔

واقعے کا مقدمہ پہلے ہی درج کیا جا چکا ہے۔ پولیس نے بتایا کہ ملزم کے قبضے سے برآمد ہونے والے اسلحے کے حوالے سے بھی قانونی کارروائی کی جا رہی ہے۔

گرفتار ملزم کا سابقہ مجرمانہ ریکارڈ چیک کیا جا رہا ہے، جبکہ واقعے سے متعلق مزید تفتیش جاری ہے۔