- امریکہ نے خانیوال کے فہیم اکرم کی گرفتاری میں مدد پر ایک لاکھ ڈالر انعام کا اعلان کیا ہے۔
- ان پر جعلی ڈاک لیبلز کا نیٹ ورک چلانے کا الزام ہے جس سے امریکی پوسٹل سروس کو 126 ملین ڈالر سے زائد نقصان پہنچا۔
- 28 ستمبر کو فلوریڈا کی جیوری نے ان پر فردِ جرم عائد کی تھی۔
- معلومات رکھنے والے افراد 1-877-876-2455 پر پوسٹل انسپکٹرز سے رابطہ کر سکتے ہیں۔
امریکا نے پاکستان کے شہر خانیوال کے رہائشی فہیم اکرم کی گرفتاری میں مدد پر ایک لاکھ ڈالر تک انعام کا اعلان کیا ہے۔ امریکی پوسٹل انسپیکشن سروس (USPIS) کے مطابق 33 سالہ فہیم اکرم پر جعلی ڈاک ٹکٹوں اور شپنگ لیبلز کا نیٹ ورک چلانے کا الزام ہے۔
حکام کے مطابق اس نیٹ ورک کے ذریعے 50 لاکھ سے زیادہ جعلی ڈاک لیبل بیچے گئے، جس سے امریکی پوسٹل سروس کو 126 ملین ڈالر سے زیادہ کا نقصان ہوا۔
“اُسے خود سے پکڑنے کی کوشش ہرگز نہ کریں۔ اگر آپ کے پاس ایسی معلومات موجود ہیں کہ وہ کہاں ہے تو امریکی حکام سے رابطہ کریں۔ امریکی پوسٹل انسپیکشن سروس نے اس کی گرفتاری اور سزا تک پہنچانے والی معلومات فراہم کرنے پر ایک لاکھ ڈالر تک انعام کا اعلان کیا ہے۔”
امریکی اٹارنی جیسن اے ریڈنگ کوئینونیز کے سرکاری ایکس اکاؤنٹ کی پوسٹ کے مطابق امریکی حکام نے فہیم اکرم کی ویب سائٹ بند کر دی ہے اور اب انھیں ڈھونڈنے کے لیے عوام کی مدد چاہیے۔ پوسٹ میں کہا گیا کہ ان کے بارے میں معلومات رکھنے والے لوگ 1-877-876-2455 پر پوسٹل انسپکٹرز سے رابطہ کریں۔ اعلان کے ساتھ ان کی تصویر بھی جاری کی گئی۔
اس سے پہلے 28 ستمبر کو امریکی ریاست فلوریڈا کی ایک جیوری نے فہیم اکرم پر امریکی پوسٹل سروس کو 126 ملین ڈالر سے زیادہ نقصان پہنچانے کے الزام میں فردِ جرم عائد کی تھی۔
عدالتی دستاویزات کے مطابق ملزم مبینہ طور پر ’لیبلز بینک ڈاٹ کام‘ نامی ویب سائٹ چلاتے تھے جس پر جعلی امریکی ڈاک لیبل بکتے تھے۔ استغاثہ کے مطابق اس ویب سائٹ نے 50 لاکھ سے زیادہ جعلی لیبل بیچے، جن سے گاہک پارسل کے وزن، حجم یا منزل کی پروا کیے بغیر نہایت کم قیمت پر بھیج سکتے تھے۔
ذرائع
- بیانامریکی پوسٹل انسپیکشن سروس (USPIS)فہیم اکرم کی گرفتاری میں مدد دینے پر ایک لاکھ ڈالر تک انعام کا اعلان اور کیس کی تفصیلات
- بیانامریکی اٹارنی جیسن اے ریڈنگ کوئینونیز کا 'ایکس' ہینڈلویب سائٹ بند کرنے اور عوامی مدد کی اپیل سے متعلق بیان
- عوامی ریکارڈعدالتی دستاویزات، فلوریڈا جیوری فردِ جرم (28 ستمبر)فہیم اکرم پر 126 ملین ڈالر سے زائد نقصان پہنچانے کا الزام اور فردِ جرم کی تفصیلات
