بی آر ٹی ریڈ لائن: ایشیائی ترقیاتی بینک کا 2029ء تک توسیع سے انکار، مشروط 10 ماہ کی مہلت کا اعلان

کراچی: کراچی کے بس ریپڈ ٹرانزٹ (BRT) ریڈ لائن منصوبے کو شدید دھچکا لگا کیونکہ ایشیائی ترقیاتی بینک (ADB) نے منصوبے کی مدت میں 2029ء تک توسیع کی حکومت سندھ کی درخواست مسترد کر دی۔ طویل المدتی توسیع کے بجائے بینک نے صرف 10 ماہ کی مشروط مہلت دی ہے۔

ذرائع کے مطابق ایشیائی ترقیاتی بینک نے حکومتِ سندھ کو ہدایت کی ہے کہ وہ اگلے 10 مہینوں کے دوران کام کی رفتار کو تیز کرے اور ہر ماہ کم از کم 5 فیصد پیشرفت یقینی بنائے۔ بینک نے اس بات پر زور دیا ہے کہ مزید کسی بھی توسیع کا انحصار پروجیکٹ پر کارکردگی میں بہتری پر ہوگا۔

حکومتِ سندھ نے منصوبے کی تکمیل کے لیے باضابطہ طور پر 2029ء تک توسیع کی درخواست کی تھی۔ تاہم نہ صرف ایشیائی ترقیاتی بینک بلکہ دیگر بین الاقوامی مالیاتی اداروں نے بھی اتنی طویل مہلت دینے سے قطعی انکار کردیا ہے۔

بی آر ٹی ریڈ لائن منصوبے کا آغاز 2019ء میں ہوا تھا اور اسے جون 2022ء تک مکمل ہونا تھا۔ تاہم 2026ء تک صرف 25 فیصد کام ہی مکمل ہو سکا ہے۔ مسلسل تاخیر کے باعث منصوبے کی لاگت میں زبردست اضافہ ہوا ہے اور ترمیم شدہ PC-I کے مطابق اخراجات 200 ارب روپے سے تجاوز کرنے کا تخمینہ ہے۔

یہ عالمی مالیاتی اداروں کا ایک مشترکہ سرمایہ کاری منصوبہ تھا جس میں ایشیائی ترقیاتی بینک (ADB)، ایشین انفراسٹرکچر انویسٹمنٹ بینک (AIIB)، فرانسیسی ڈیوپلپمنٹ ایجنسی (AFD) اور گرین کلائمیٹ فنڈ (GCF) شامل ہیں۔ ان اداروں نے مل کر 417 ملین ڈالر (41 کروڑ 80 لاکھ ڈالر) کی رقم بطور قرضہ فراہم کی، جو اس وقت 158.50 روپے فی ڈالر کے تبادلے کی شرح کے مطابق پاکستانی روپے میں تقریباً 66 ارب 37 کروڑ روپے بنتے تھے۔ دوسری جانب حکومتِ سندھ نے اس منصوبے میں اپنا حصہ 6 کروڑ ڈالر ڈالا تھا جو اس وقت 12 ارب روپے بنتے تھے۔ اس طرح بی آر ٹی ریڈ لائن منصوبے کی کل لاگت 78 ارب 38 کروڑ روپے طے ہوئی تھی، جو اب بڑھ کر 200 ارب روپے سے اوپر نکل چکی ہے۔

تین سال گزرنے کے بعد 2022ء میں مکمل نہ ہونے پر منصوبے کی مدت 2024ء تک بڑھائی گئی تھی، لیکن ریڈ لائن منصوبہ 2026ء میں بھی صرف پچیس فیصد سے آگے نہ بڑھ سکا ہے۔