پانی کے بحران سے ستائے شہریوں نے واٹر کارپوریشن کے ایم ڈی کے دفتر کا گھیراؤ کرلیا

کراچی: سولجر بازار اور پارسی کالونی کے اطراف میں پانی کے شدید بحران سے ستائے لوگوں نے نائنتھ مائل کارساز پر کراچی واٹر سیوریج کارپوریشن کے ایم ڈی احمد علی صدیقی کے دفتر کا گھیراؤ کرلیا۔ احمد علی صدیقی نے اپنے بچاؤ کے لئے پولیس طلب کرلی۔

مکینوں کا موقف تھا کہ وہ پانی اور سیوریج کے ٹیکس ادا کر رہے ہیں، لیکن گزشتہ کئی ماہ سے ان کے گھروں میں پانی کی ایک بوند بھی فراہم نہیں کی گئی۔ متعلقہ عملے سے رابطہ کیا جائے تو وہ کوئی جواب نہیں دیتا، اور واٹر بورڈ کے مقامی دفتر میں کوئی ذمہ دار موجود نہیں ہوتا جو بتا سکے کہ ان کے علاقے میں پانی کب آئے گا۔ اس کی وجہ سے لوگ ٹینکروں کے ذریعے مہنگا پانی خریدنے پر مجبور ہیں، جبکہ علاقے میں سیوریج کی صورتحال بھی انتہائی خراب ہے۔