مصطفیٰ کمال کےخلاف منفی مہم ، پس پردہ عوامل کیا ہیں؟

ایف آئی اے کی جانب سے حج اور عمرہ زائرین کے لیے ویکسین کی خریداری کی تحقیقات کو بعض حلقوں کی جانب سے دس ارب روپے کی مبینہ خورد برد کے اسکینڈل کے طور پر پیش کیا جا رہا ہے۔

جبکہ حقیقت یہ ہے کہ جس ٹینڈر کو اس اسکینڈل کی بنیاد بنایا جا رہا ہے، اس کے اجرا کے وقت نہ تو مصطفیٰ کمال کو اس کا علم تھا اور نہ ہی ان کے دستخط سے ٹینڈر جاری کرنے کے احکامات دیے گئے تھے، تحقیقات کا تعلق تقریباً 18 کروڑ روپے کی رقم سے ہے، جسے دس ارب روپے کی خورد برد کے طور پر پیش کرکے رائی کا پہاڑ بناکر سنسنی پھیلائی جارہی ہے اور گرفتاری کی کسی کی ذاتی خواہش کو خبر بنایا جارہا ہے اور جس رقم کی خورد برد کا واویلا مچایا جارہا ہے وہ رقم قومی خزانے میں موجود ہے اور تحقیقاتی رپورٹ وزیراعظم کو پیش کی جا چکی ہے۔

مصطفیٰ کمال کی کارکردگی یہ ہے کہ برسوں سے غیر فعال پاکستان اور چین کے تعاون سے قائم اسپتال کو دوبارہ فعال کرنا ان کے نمایاں اقدامات میں شامل ہے۔ وزیراعظم نے بھی اس منصوبے کی تکمیل پر مصطفیٰ کمال کی تعریف کرتے ہوئے کہا تھا کہ ”وفاقی وزیر نے ان کے خواب کو عملی شکل دی ہے۔“

اس کے علاوہ جعلی اور غیر رجسٹرڈ ادویات کے خلاف کارروائیوں اور ادویات کی پیکنگ پر بارکوڈ سسٹم متعارف کرانے کے اقدامات کو بھی اہم قرار دیا جا رہا ہے۔

ادویات کے شعبے میں شفافیت، مصنوعات کی شناخت اور سپلائی چین کی نگرانی کا نظام غیر قانونی کاروبار میں ملوث مافیا کے لئے ایک مصیبت بن گیا ہے اورجعلی ادویات کی تیاری اور فروخت سے وابستہ یہی مافیا مصطفیٰ کمال کے خلاف مہم کو ہوا دے رہے ہیں