آزاد کشمیر کا 79واں یومِ تاسیس، مظفرآباد میں پروقار تقریب، قومی اتحاد اور حقِ خودارادیت پر زور

آزاد کشمیر کے 79ویں یومِ تاسیس کے موقع پر دارالحکومت مظفرآباد میں ایک پروقار تقریب کا انعقاد کیا گیا، جس میں صدر آزاد جموں و کشمیر ڈاکٹر محمد نجیب نقی سمیت سرکاری حکام اور شہریوں کی بڑی تعداد نے شرکت کی۔

تقریب کا آغاز پاکستان اور آزاد کشمیر کے پرچم لہرانے اور قومی و ملی ترانوں سے ہوا۔ اس موقع پر چاق و چوبند دستے نے پریڈ پیش کی، جس کا معائنہ مہمانِ خصوصی صدر آزاد جموں و کشمیر نے کیا۔ تقریب میں طلبہ نے ملی نغمے پیش کیے، جنہیں حاضرین نے سراہا، جبکہ صدر آزاد جموں و کشمیر نے سرکاری حکام اور مختلف شعبہ ہائے زندگی سے تعلق رکھنے والی شخصیات میں اعزازی تمغے بھی تقسیم کیے۔

تقریب سے خطاب کرتے ہوئے صدر آزاد جموں و کشمیر ڈاکٹر محمد نجیب نقی نے کہا کہ 24 اکتوبر 1947 کو آزاد حکومتِ ریاست جموں و کشمیر کا قیام ہمارے اسلاف کی عظیم قربانیوں اور آزادی کے لیے بے مثال جدوجہد کا ثمر ہے۔

انہوں نے کہا کہ کشمیر پاکستان کی شہ رگ ہے اور پاکستان و کشمیر ایک دوسرے کے لیے لازم و ملزوم ہیں۔ حکومتِ پاکستان اور پاکستانی عوام کی جانب سے کشمیریوں کی سیاسی، سفارتی اور اخلاقی حمایت قابلِ قدر ہے۔

صدر آزاد جموں و کشمیر نے مقبوضہ جموں و کشمیر کے عوام کی استقامت اور قربانیوں کو خراجِ تحسین پیش کرتے ہوئے عالمی برادری اور اقوامِ متحدہ پر زور دیا کہ وہ سلامتی کونسل کی قراردادوں کے مطابق کشمیری عوام کو حقِ خودارادیت دلانے کے لیے اپنا کردار ادا کریں، تاکہ خطے میں دیرپا امن قائم ہو سکے۔

انہوں نے کہا کہ قومی اتحاد اور مضبوط ادارے ہی خوشحال ریاست کی بنیاد ہیں۔ ان کا کہنا تھا کہ پاکستان اور آزاد جموں و کشمیر کا رشتہ محض جغرافیائی نہیں بلکہ اسلامی، نظریاتی اور روحانی بنیادوں پر استوار ہے۔ جس طرح پاکستان کشمیر کے بغیر نامکمل ہے، اسی طرح کشمیر بھی پاکستان کے بغیر نامکمل ہے۔

صدر آزاد جموں و کشمیر نے معرکۂ حق کے نتیجے میں پاکستان کی جنگی اور سفارتی فتح پر وزیراعظم شہباز شریف، فیلڈ مارشل سید عاصم منیر اور پاک فوج کو مبارکباد بھی پیش کی۔

تقریب میں یومِ تاسیس کے حوالے سے آزادی کی جدوجہد، کشمیری عوام کی قربانیوں، قومی یکجہتی اور مسئلہ کشمیر کے پرامن حل کے عزم کا اعادہ کیا گیا۔