کراچی کے ساحل پر پہلی بار 45 فٹ طویل اسپرم وہیل دیکھے جانے کا انکشاف

سندھ کے ساحل پر پہلی بار اسپرم وہیل دیکھی گئی ہے۔ عالمی ادارہ برائے تحفظِ فطرت (ڈبلیو ڈبلیو ایف پاکستان) کے مطابق دیکھی جانے والی اسپرم وہیل کی لمبائی تقریباً 45 فٹ ہے۔

ڈبلیو ڈبلیو ایف پاکستان کے مطابق اسپرم وہیل کی ویڈیو بھی ریکارڈ کی گئی ہے، جس میں اس کی مخصوص جسمانی علامات واضح طور پر دیکھی جا سکتی ہیں۔

ادارے کا کہنا ہے کہ پاکستان کی سمندری حدود میں وہیل اور ڈولفن سمیت سیٹیشینز کی 26 اقسام موجود ہیں۔ ان میں بلیو وہیل، برائیڈز وہیل اور عربین سی ہمپ بیک وہیل بھی شامل ہیں۔

ڈبلیو ڈبلیو ایف کے مطابق اسپرم وہیل خوراک کی تلاش میں عموماً 300 سے 800 میٹر گہرائی تک غوطہ لگاتی ہے، جبکہ بعض اوقات یہ ایک سے دو کلومیٹر گہرائی تک بھی پہنچ جاتی ہے۔

ادارے نے خبردار کیا ہے کہ ماہی گیری کے جال، بحری جہازوں سے ٹکراؤ اور سمندری آلودگی آبی حیات کے لیے بڑے خطرات ہیں۔ سمندری جانداروں کے تحفظ کے لیے ماہی گیری کے ذمہ دارانہ طریقوں کو فروغ دینا ضروری ہے۔

ڈبلیو ڈبلیو ایف پاکستان نے ملک کے سمندری حیاتیاتی تنوع کے تحفظ کے لیے مؤثر اقدامات کی ضرورت پر زور دیا ہے۔